Irutxuloko Hitza

ingurumenA »

Errauskailua Zubietan jartzearen alde edo kontra dagoen erabakiko du gaur Gobernu Batzordeak

Aralarrek Zubietako kokalekuari buruzko argibideak eskatu dizkio Aldundiari

maider azurmendi

Zubietako lurretan errauskailua jartzeko Foru Aldundiak egindako proposamenari baiezkoa edo ezezkoa emango dio gaur Udaleko Gobernu Batzordeak. Odon Elorza alkateak orain bi aste aurreratu zuenez, Udalak onartu egingo du proposamena. Hala ere, behin betiko erabakia eguerdiko bileraren ostean jakinaraziko du alkateak. Hori horrela izanik, Aldundiarekin elkarlana hasiko luke Udalak.

Bitartean, errauskailua hizpide izan zuten atzo Batzar Nagusietako batzordean. Luis Mari Oiarbide Garapen Iraunkorreko diputatuak errauskailuaren kokapenaz hitz egin zuen, Aralar taldearen galderei erantzunez.

Aralarrek Zubietan proposatutako kokagunea behin betikoa den argitzeko eskatu zion diputatuari. Diputatuak, bere aldetik, Udalak erabakitzen duenaren arabera izango dela erantzun zuen. Udalak baiezko erantzuna ematea espero zuela gaineratu zuen Oiarbidek. Hala ere, gaurko bileraren baitan utzi zuen erantzuna.

Segidan, Oiarbideren kudeaketaren aurka gogor egin zuen Aralarrek. Honela, errauskailuaren kokagunea PSOE alderdiarekin hitzartu izana leporatu zion diputatuari; baina adierazpen hori berehala ezeztatu zuen Oiarbidek.

Argibide eske

Honen haritik, gainontzeko taldeek ere herritarrei gauzak argi esateko eskatu zioten diputatuari. Errauskailuaren kokalekua erabakitzeko orduan Aldundiak nahasmen ugari eragin zuela aurpegiratu zioten Oiarbideri eta behingoz gauzak garbi esateko eskatu.

Errauskailuaren kokalekuaren kontua hilabete luzez eztabaidatzen ari dira. Hasiera batean, Aldundiak hamar kokaleku posible jarri zituen mahai gainean, eta teknikoen irizpideak jarraituz, batzuek atzera bota zituzten.

Azken hilabeteetan Aritzeta, Landarbaso eta Zubieta aipatu dira kokaleku egoki gisa. Lehena bertan behera geratu zen, kontrako txostenak jasotzean. Landarbaso baztertu ondoren, Zubietakoa aztertzeari ekin zioten.

Udalak du kokalekuaren giltza eta aurreikuspen guztien arabera, Zubieta izango da.