Irutxuloko Hitza

ingurumena »

Errauskailua non jarri isilpean onar lezakete

Baga Bogak dio astearteko udalbatzarreko eguneko zerrendan ez dela gaia azaltzen

erredakzioa

Baga Boga herri ekimenak salatu duenez, astearteko udalbatzarrean Zubietan errauskailua kokatzea onar dezakete. Baga Bogaren arabera, errauskailuari buruzko puntua ez da eguneko zerrendan azaltzen, baina Odon Elorza alkateak gaia premiazkoa dela bozkatzea proposatzen badu, eztabaidatu ahal izango da asteartean bertan.

Herri ekimenak salatu duenez, «oso susmagarria da gai zerrendan ez egotea, baina horregatik esan nahi diegu errauskailuaren aurka dauden lagun eta erakunde guztiei adi egon daitezela». Baga Bogak Odon Elorzari mezu bat helarazi nahi izan zion: «Horrelako joko zikina egiteko saioa bertan behera utz dezala eskatu nahi diogu».

Zubietako Herri Batzarrak herritar galdera egingo dio alkateari udalbatzarrean errauskailuaren inguruan: «Elorzari eskatu nahi diogu erantzun ditzala zubietarren kezkak eta publikoki aurpegia eman dezala».