Irutxuloko Hitza

Santio eta San Inazio artean, festa giroan izango dira zubietarrak

Donostiako Txistularien Udal Bandak girotuko du Zubieta bihar eta San Inazio egunean izango dira ekitaldi gehien

raul perez

Bihar hasiko dira Zubietako Santio jaiak. Donostiako Txistularien Udal Bandak girotuko du herria. Diana izango da 09:30ean eta zortzikoak eta biribilketak joko dituzte. Ondoren, mezatara doazenei agurra joko diete eta eguerdian, soka dantzan izango dira. Hain zuzen ere, soka dantza izaten da Santio jaietako ekitaldi jendetsuenetako bat. Zubietarrek beraiek egiten dute dantza eta jende asko izaten da emanaldia ikusten.

Santio egunean bertan izango dira aurten herri kirolak. Hori da aurtengo jaietako berrikuntzetako bat, izan ere, aurreko urteetan San Inazio egunean izan dira. Herri kirolak Santio egunean, eta trikitixa txapelketa San Inazio egunean, asteartean.

Hain zuzen ere Santio egunarekin batera San Inazio da jaietako egun handia. San Inazio egunean izango da jarduera gehien. Zubietako errebote txapelketaren finala izango da goizean, zikiro jatea egingo dute gero, eta gauean trikitixa txapelketaren ostean, bertso saioa izango da. Anjel Mari Peñagarikano eta Sebastian Lizaso izan dira azken urteetan Zubietan, eta aurten Jon Maia, Amets Arzallus, Maialen Lujanbio eta Mañukorta ariko dira bertsotan Xabier Sukiaren esanetara.

san inazio eguna

Errebote txapelketaren finala, zikiro jatea, trikitixa txapelketa eta bertso saioa egingo dituzte

egitaraua »

uztailak 25, bihar

09:30. Diana Donostiako Txistularien Udal Bandarekin.

10:30. Jaiak hasiko dira buruhandi eta txalapartariekin.

11:00. Meza nagusia. Ondoren hamaiketakoa eta soka dantza.

18:00. Herri kirolak: txinga, trontza, zaku-karrera, korrika, sagar-biltzea, lokotx-biltzea.

uztailak 26, etzi

06:00. Oilasko biltzaileen irteera.

14:00. Oilasko biltzaileak itzuliko dira.

uztailak 27, ostirala

10:00. Jolasak hasiko dira.

14:00. Bazkaria. Nork bere bazkaria eraman behar du eta jai batzordeak prestatuko du postrea.

16:00. Jolasen jarraipena.

18:00. Gorriti Showa.

19:30. Txokolate jatea.

23:30. Laiotz taldearekin dantzaldia.

uztailak 28, larunbata

10:00. Piraguan ibiltzeko aukera Aliriko zubian.

16:00. Mus txapelketa.

17:00. Altxorraren bila.

21:00. Herri afaria.

00:00. Dantzaldia Tapia eta Leturiarekin. Ondoren dantzaldia Izotz taldearekin.

uztailak 29, igandea

10:00. Artisauak eta erraustegiaren aurkako marrazki lehiaketaren erakusketa.

12:30. Meza eta ondoren sagardo dastaketa.

14:00. Jubilatuen bazkaria.

18:00. Buruhandiak

19:00. Sardina jatea

23:30. Axular DJaren tinbal emanaldia.

uztailak 30, astelehena

17:00. Futbito partidak: gazteak ez hain gazteen aurka ariko dira.

18:30. Esku pilota partidak

19:30. Buruhandiak.

00:00. Mendeku itxua eta Su Ta Gar. Ondoren dantzaldia Triki Ta Kerekin.

uztailak 31, asteartea

06:00. Txokolate jatea eta nahi duenak karaokean abesteko aukera izango du.

07:00. Sokamuturra.

09:00. Zikiroa prestatzen hasiko dira.

10:30. Meza.

11:00. Errebote partida.

14:00. Zikiro jatea.

18:00. Billabonako Solano Musika Eskolaren X. Trikitixa Txapelketa. Ondoren Ansorregi eta Larrañaga trikitilariak.

22:30. Bertso saioa: Maialen Lujanbio, Amets Arzallus, Jon Maia eta Mañukorta. Xabier Sukia izango da gai jartzailea. Bertso saioa eta gero, Ansorregi eta Larrañaga trikitilarien saioak jarraituko du.

00:00. Zezensuzkoa